II. Aste Historikoa: Musika Barrokoa

Joaquín Maya Musika Eskola Bereziak II. Aste Historikoa ospatuko du

Joaquín Maya Musika Eskola Bereziak bigarren Aste Historikoa eginen du ikasturte honetan, oraingoan Barrokoko musika ardatz harturik. Aste Historikoa iaz hasi zen egiten, Erdi Aroaren eta Errenazimentuaren inguruan, eta txoko bat izanen du ikasmaila guztietan, halako moduan non urtero musikaren historiaren garai bati helduko baitzaio, Erdi Aroan hasi eta gaur egunera arte. Horrela, ikasleek, Eskolan matrikulatuta dauden bitartean, oinarrizko ezagutza jasoko dute garai guztietako musikei buruz.

II. Aste Historikoa maiatzaren 20an hasiko da, astelehenarekin, eta horren kariaz, Eskola girotuko dugu, apaingarriz eta musikaz. Erakusketa didaktikoa ere egonen da, aurten ezagutarazi nahi den garaiko mugarrien ingurukoa. Aste osoan zehar, taldekako eskoletan, irakasleek entzunaldi iruzkinduak, bideo-proiekzioak eta bestelako jarduerak programatuko dituzte.

Hona hemen II. Aste Historikoaren harira Musika Eskolako ekitaldi-aretoan eginen diren ekitaldi nagusiak:

Maiatzaren 22an, asteazkenarekin, 20:00etan, Juan Carlos Aoiz irakaslearen tronboi-ikasleek kontzertua emanen dute, “Tronbarrokoak” izenburupean.

Hilaren 23an, ostegunarekin, geure ekoizpen bat estreinatuko dugu: Kontzertu barrokoa: omenaldia Juan Sebastian Bach-i. Kontzertu honetan Eskolako ikasleek eta irakasleek joko duten musika barrokoa izanen da entzungai, eta, baita ere, Pequeño libro de Anna Magdalena Bach liburuko zenbait irakurgai. Bi kobntzertu eginen dira: 17:30ean eta 18:30ean.

24an, ostiralarekin, 18:30ean, kontzertu didaktikoa eskainiko dugu Danserye taldearen eskutik.

II. Aste Historikoari ekainaren 3an emanen zaio buru, Iturramako Civivoxean, Eskolako ikasle eta irakasleek oholtza gainera eramanen duten musika-antzerkiaz: Joaquín eta maiak, moda-modako antzerkia. Bi emanaldi egonen dira, 18:00ean eta 19:30etan. Francesco Scholamúsica da pertsonaia nagusia, lurra jotzekotan dagoen opera-enpresaria. Eskuidatzi bat aurkitu du, eta horretan orain arte erdietsi ez duen arrakasta lortzeko sekretua dagoela uste du: Benedetto Marcelloren[1] "Antzerkia moda-modan". Enpresariaren etxean gertatzen da dena, bertan entzunaldiak eta elkarrizketak egin behar baititu prestatzen ari den hurrengo operarako: Joaquín eta maiak. Hautaketa eskuidatzi horren jarraibideekin bat egingo du...

---

[1] Benedetto Marcellok izenik gabe argitaratu zuen, 1720an, Il teatro alla moda (Antzerkia moda-modan,) garaiko opera-munduaren gaineko satira.